Dangding Tawasul Ka Sumedangan

Duh Gusti hariwang jagat
Lamun teu gancang di ruat
Ku Sholat reujeung Sholawat
Ngarah datangna karamat

Hyang Widi lungsurkeun rohmat
Tur ti Jah Nabi Muhammad
Tutulung reujeung Syafaat
Kalayan teu kendat-kendat

Ka Gamparan Kula nyelir
Wasilah Syekh Abdul Qodir
Ngarah hate henteu mungkir
Tumarima kana taqdir

Ngahaja dangding di karang
Ku Putra Asli Sumedang
Ngarah Diri gera gancang
Tepung jeung nu henteu Anggang

Berkahna ti anu lingih
Di palihan Bojong Sampih
Pangersana Eyang Sugih
Mugia hasil nu di suprih

Ti kulon Karuhun Nangtung
Tilu Jalma nu linuhung
Karamat nu Maha Agung
Ngarah Kula teu ka sarung

Ti kidul Angka Wijaya
Nu kawit ti Kutamaya
Hanjuang na tetep aya
Jumeneng Jayaperkasa

Ti wetana di Ci Paku
Aji Putih nu ngawengku
Nu alus lampah jeung laku
Ka rahayat daek mangku

Putrana di Gunung Lingga
Wastana Tajimalela
Wasilah Insun Medalna
Nepika jadi Rajana

Ti kaler di Ci Sarua
Pangeran Bungsu wastana
Santowan jadi gelarna
Awiluar kadituna

Nu ngageugeuh Gunung Puyuh
Pangeran Sugih nu tangguh
Sok tutulung kanu ripuh
Nu jahat nepika nyuuh

Katelah Pangeran Santri
Kusumahdinata pasti
Nu nyebar Islam Sajati
Wujud Sumedang Kiwari

Ku berkat tur karamatna
Ti luluhur Sumedangna
Mugia Abdi sadaya
Kenging Ridho ti Gustina

Share this post